سەرۆک بارزانی پەیامەک ل دۆر روودانا شڤێدی بەلاڤکر و راگەھاند، سفکاتیکرن ب رەمز و موقەدەساتێن خەلکی د ناڤا فەرھەنگا گەلێ کوردستانێ دا نینە و کەسێن بارەگەھێ پارتی ژی ل بەغدا سۆتی ب تێکدەر ناڤکرن.
سەرۆک مەسعوود بارزانی ئەڤرۆ راگەھاند، سفکاتیکرن ب پیرۆزی و ھێمایێن بلند ب چ شێوەیەکی یا قەبوولکری نیە و بەزاندنا وان ھێلا سۆرە و ب توندی ئیدانەیا وێ سفکاتیێ دکەین یا شڤێدی ژ ئالیێ کەسەکی ب مەرجەعەیەتێ ھاتیە کرن.
ھەروەسا بارزانی دیارکر، ئەو رەنگی سەرەدەرییا نە نەھەژی, چ پەیوەندی ب گەلێ کوردستانێ و پارتی دیمۆکراتی کوردستان ڤە نینە و کوردستان خودان فەرھەنگەکا بلندا پێکڤەژیانێ یە و سفکاتیکرن ب رەمز و موقەدەساتێن خەلکی د ناڤا فەرھەنگا گەلێ کوردستانێ دا چ جاران جھێ خۆ نەکریە و ناکەت ژی و گەلێ کوردستانێ رێز و پێزانین بۆ مەرجەعیەتێ ھەنە، پەیوەندیێن مێژووی و دۆستایەتی و ھەڤسۆزیێن ناڤبەرا بارزانیێ نەمر و ئایەتۆللا حەکیم و شەھید سەدر دۆستایەتیا دێرینە، ئەو کەسێ سفکاتی ژی کری ژ ئالیێ قانوونێ ڤە ھاتیە گرتن و دێ سزایێ تاوان و زێدەگاڤیا خۆ دەت.
ھەروەسا سەرۆک بارزانی ب توندی ئیدانا سۆتنا بارەگەھێ پارتی دیمۆکراتی کوردستان ل بەغدایێ کر کو ئەڤە دوەمین جارە ژ ئالیێ کۆمەکا تێکدەر و شکەستیان ڤە ئەڤ رەفتارە دھێتە کرن و گۆت: ئەڤ یەکە بەلگەیە ل سەر نەبوونا سەقامگێریێا ئاسایشێ و د راستی دا ئەو دو گرۆپە ژبلی خرابیێ و تێکدانێ و تێگڤەدان چ دی ژ دەست نەھاتیە.
